Dewch i Adnabod: Nic Clarke, Rheolwr Digwyddiadau
Nic Clarke yw Rheolwr Digwyddiadau Ymchwil Canser Cymru. Yn ogystal â chefnogi ein holl redwyr gwych sy’n codi arian, mae Nic yn rhedwr, yn hyfforddwr rhedeg, yn sylwebydd. Mae Nic yn Gyfarwyddwr Ras, hefyd
Ydy stori Nic wedi ei hysbrydoli i redeg i Ymchwil Canser Cymru?
Os felly, edrychwch ar ein hamrywiaeth o ddigwyddiadau rhedeg!
Ein Digwyddiadau
Fi yw Rheolwr Digwyddiadau Ymchwil Canser Cymru, ac rwy’n gweithio gyda nifer o drefnwyr digwyddiadau yma yng Nghymru, ledled y Deyrnas Unedig ac mewn rhannau eraill o’r byd.
Rwyf wedi datblygu ein partneriaethau â rasys allweddol yng Nghymru, yn cynnwys Hanner Marathon Caerdydd, 10K Bae Caerdydd, Hanner Marathon Abertawe a mwy – rydym ni hefyd wedi cefnogi ailgyflwyno Ras Dydd Gŵyl Dewi.
Ar wahân i redeg, rwy’n gofalu am ein partneriaeth â ‘The Tour of Pembrokeshire’, ac yn gofalu am gefnogwyr sy’n cymryd rhan mewn gweithgareddau nenblymio, gwifren wib, teithiau yn y Deyrnas Unedig a thramor.
Rwyf hefyd wedi gweithio gyda’r tîm codi arian i gyflwyno digwyddiadau ychwanegol, yn cynnwys, ‘My Curry Night’, ‘Reimagined Fashion’ a’n digwyddiad blaenllaw, ‘Stripe-a-Pose’.
O ddechreuadau cymedrol
Dechreuais i ymwneud â digwyddiadau rhedeg a chyfranogiad torfol pan ofynnwyd i mi lywyddu a sylwebu mewn digwyddiad newydd a oedd yn dod i Gaerdydd.
Tyfodd y digwyddiad o ‘ddechreuadau cymedrol’, gyda thua 350 o redwyr, yn yr un modd â’r ceisiadau gan drefnwyr rasys eraill i mi sylwebu yn eu rasys nhw.
Ces fy hyfforddi i fod yn Gyfarwyddwr Ras a bûm yn darparu rasys ledled y Deyrnas Unedig, yn ogystal â chefnogi trefnwyr ras newydd a myfyrwyr sy’n astudio rheoli digwyddiadau.
Bûm yn ffodus iawn i weithio ar rai o rasys mwyaf a mwyaf adnabyddus y Deyrnas Unedig. Fodd bynnag, y peth rhyfedd yn hyn i gyd yw’r ffaith nad oeddwn i’n rhedeg ar y pryd.
Roeddwn i’n credu na fydden i’n gallu rhedeg oherwydd anafiadau i’m pen-glin pan oeddwn i’n iau.
Yn 2019, tra oeddwn i’n Gyfarwyddwr Gweithrediadau ras fawr 10K yn y Deyrnas Unedig, bu fy nghydweithwyr yn fy annog i ddechrau rhedeg.
Er gwaethaf protestiadau am ‘bengliniau gwael’, ymgymerais â’r her a chwblhau ‘Couch to 5K’, yn y pen draw.
Dechreuais i wella fy amser, gan ysgrifennu am redeg tra’n olrhain fy nghynnydd. Un diwrnod, edrychais ar fy mhen-glin dde, a oedd yn ymddangos ddwywaith maint yr un chwith!
Roedd y cyfan yn ymddangos yn broffwydoliaeth hunangyflawnol – roeddwn i wedi dweud wrth bobl bod gen i broblemau â’m pengliniau gydol fy oes – a dyma fi yn yr un sefyllfa eto.
Un diwrnod, gwelodd ffrind da iawn a chyn-athletwr fy mhen-glin a oedd wedi’i strapio’n helaeth, a dywedodd “Ti’n rhedeg yn rhy gyflym!” Roedd e’n iawn. Dylwn i fod wedi parhau i ddilyn fy nghynllun a chynyddu’n raddol.
Treuliais i chwe mis yn gwella, gan fynd yn syth i mewn i gyfnod clo ym mis Mawrth 2020, a dechrau pandemig byd-eang COVID.
Rhedeg trwy’r pandemig
Fel cymaint o bobl eraill yn ystod y pandemig, ar y dechrau, doedd gen i ddim byd i’w wneud. Bydden i’n mynd am dro bob dydd, ac un diwrnod, meddyliais am loncian at bob yn ail bolyn lamp.
Yn raddol, dros gyfnod, cynyddais i nifer y polion lampau roeddwn i’n loncian heibio, gan wneud yn siŵr fy mod i’n cadw at gyflymdra cyson.
O fewn ychydig wythnosau, roeddwn i wedi dechrau rhedeg 5K eto, a dechreuais i her rithiol i redeg hyd Llwybr Arfordir Cymru - 870 milltir.
Bob dydd, byddwn i’n rhedeg ac yn cofnodi fy mhellter. Ceisiais i fynd o 5K i 10K, a oedd yn her, ond gyda chymorth a chefnogaeth gan ffrindiau, llwyddais i’w wneud!
Rhedodd un o’m ffrindiau 10K gyda fi, a dywedodd fy mod i’n fwy medrus nag yr oeddwn i’n ei gredu.
Gan fod digwyddiadau wedi’u gohirio o hyd, lansiodd Marathon Llundain ddigwyddiad ‘Marathon Rhithwir’ i’w gwblhau ddechrau mis Hydref 2020.
Gydag ychydig o anogaeth gan ffrindiau a theulu, y peth nesaf roeddwn i’n ei wybod oedd fy mod i’n hyfforddi ar gyfer marathon – a llwyddais i’w gwblhau!
Dros y cyfnod hwnnw o saith mis, sylweddolais fy mod i wedi dal y ‘byg rhedeg’ y mae pob rhedwr yn gyfarwydd ag e’.
Roedd yn ymddangos yn rhyfedd fy mod i wedi dal y byg heb unrhyw ddigwyddiadau wyneb yn wyneb i hyfforddi ar eu cyfer, ond yn raddol, dechreuodd mwy a mwy ohonyn nhw ailddechrau.
Help llaw
Mae rhedeg, hyfforddi a chadw cymhelliant ar eich pen eich hun yn anodd.
Roeddwn i’n gwybod am grŵp o redwyr lleol, felly un dydd Sul, es i draw i’w cyfarfod.
Yr wythnos honno, rhedodd y tri ohonom ni gyda’n gilydd, gan siarad wrth i ni redeg.
Roedd hyn nid yn unig yn helpu pasio’r amser, ond mae hefyd yn golygu eich bod yn rhedeg ar gyflymdra cyson a chyflawnadwy.
Dechreuais i redeg gyda’m ffrindiau rhedeg newydd ddwywaith yr wythnos.
Gan fod rhai digwyddiadau’n dechrau’n ôl, cofrestrais yn y Balot ar gyfer Marathon Llundain 2021.
Gan fy mod i wedi gweithio ym Marathon Llundain yn y gorffennol, roeddwn i’n gwybod y byddai gormod o alw am leoedd, ond er mawr syndod i mi, ces i le. Buan y dechreuais i hyfforddi mwy.
Dechreuais gynyddu fy mhellter a rhedeg gyda grwpiau ychydig yn fwy, ac ar ddiwedd mis Medi 2021, cymerais ran yn ras 10k Bae Caerdydd, sef fy nigwyddiad cyfranogiad torfol cyntaf erioed fel rhedwr.
Wythnos yn ddiweddarach, ymunais â 40,000 o redwyr ar ddechrau llinell Marathon Llundain.
Mae pobl yn aml yn siarad am eu profiad o Farathon Llundain. I mi, hwn oedd y ‘diwrnod allan’ gorau erioed!
Roeddwn i wedi gwneud yr hyfforddiant a’r ‘Marathon Rhithwir’ y flwyddyn flaenorol, felly roedd hyn wedi rhoi’r hyder i mi wybod y gallen i gwblhau’r pellter. Roeddwn i’n gwybod nad oeddwn i’n mynd i ennill, ond ces i hwyl!
Casglwr medalau
Er mis Mawrth 2020, rwyf wedi rhoi nod i mi fy hun gwblhau o leiaf un neu ddau farathon bob blwyddyn.
Rwyf wedi cwblhau sawl hanner marathon, yn cynnwys y Great North Run ac amrywiaeth o ddigwyddiadau 10K.
Rwy’n parhau i hyfforddi ac addysgu rhedwyr eraill, yn ogystal â sylwebu’n rheolaidd mewn rasys ledled y Deyrnas Unedig, yn gwirfoddoli yn ParkRun yng Nghaerdydd ac mewn digwyddiadau eraill.
Pam rhedeg?
Ychydig o wahanol resymau! Efallai oherwydd nad ydw i’n mwynhau seiclo – dydw i ddim yn wych ag uchder – ac mae’n cymryd oesoedd i mi fynd i mewn i bwll nofio!
Mae rhedeg i mi yn ffordd o helpu i aros yn egnïol.
Mae’r ochr gorfforol yn dda i iechyd a ffitrwydd cyffredinol, heb sôn am y buddion dirifedi i iechyd meddwl, hefyd.
Wrth redeg, mae angen i chi ganolbwyntio o ddifri ar yr hyn rydych chi’n ei wneud, ac mae hynny’n helpu clirio mathau eraill o straen o’ch pen.
Mae cyflawni her i elusen yn rhoi’r cymhelliant ychwanegol hwnnw o wneud rhywbeth i bobl eraill, a gofynnir i chi gymryd cyfrifoldeb wrth godi arian a threfnu.
Mae’n anos tynnu’n ôl o her wedi i chi ddweud wrth bobl beth rydych chi’n ei wneud a pham.
Rwyf wrth fy modd yn dod i adnabod ein rhedwyr, darllen eu hanesion ar eu tudalen codi arian a deall eu cymhelliant.
Pan fyddwn ni’n cyfarfod ar ddiwrnod y ras, mae fel cwrdd â ffrind rydych chi wedi dod i’w adnabod ac yn awr yn cael cwrdd wyneb yn wyneb.
Mae’r gymuned redeg mor gefnogol i’w gilydd.
P’un a yw ar gyfer y diwrnodau gwlyb hynny neu gyda chyngor am hyfforddi, neu drwy gefnogi’r rheiny sy’n codi arian ar gyfer achosion gwych – hyd yn oed os nad ydyn nhw eu hunain.
Ar ddiwrnod ras, does ond angen i chi edrych o gwmpas a gweld yr holl dopiau amryliw sy’n cynrychioli’r elusennau ardderchog y mae’r rhedwyr yn rhedeg ar eu rhan.
Ar ôl y ras, mae’n wych clywed yr holl hanesion gan ein rhedwyr wrth iddyn nhw rannu eu profiad ac edrych i’r dyfodol am eu her nesaf.
