Addewid i gefnogwyr

Fel elusen annibynnol yng Nghymru, nid ydym yn cael unrhyw gyllid gan y llywodraeth a dibynnwn ar haelioni cefnogwyr i ariannu ymchwil o’r radd flaenaf yma yng Nghymru. Sut bynnag rydych chi’n penderfynu ein cefnogi ni, rydym ni wir yn gwerthfawrogi eich ymrwymiad. Yn gyfnewid am hynny, rydym am wneud ein hymrwymiad ni i chi.

Rydym ni’n addo:

Bod yn glir, yn onest ac yn agored

• Byddwn bob amser yn cael ein harwain gan ein gweledigaeth, sef Cymru’n unedig yn erbyn canser trwy ymchwil o’r radd flaenaf, a’n cenhadaeth i wneud yn siŵr nad oes rhaid i bobl Cymru dderbyn bod canser yn glefyd sy’n bygwth bywyd
• Byddwn ni’n glir am bwy ydym ni a beth rydym ni’n ei wneud. Rydym ni’n falch o fod yn elusen sy’n codi ac yn gwario arian yng Nghymru i helpu pobl y mae canser wedi effeithio arnynt, a’u hanwyliaid
• Byddwn yn dweud wrthych am y gwahaniaeth y mae eich cefnogaeth wedi’i wneud ac y gallai wneud, a bod yn onest am yr heriau rydym ni’n eu hwynebu

Bod yn barchus

• Byddwn yn parchu eich hawliau a’ch preifatrwydd. Mae eich manylion yn ddiogel gyda ni ac ni fyddwn fyth yn eu gwerthu i drydydd parti. Darllenwch ein polisi preifatrwydd llawn.
• Byddwn yn defnyddio eich manylion yn y ffordd rydych chi wedi cytuno iddi ac yn ei gwneud hi’n haws i chi newid y ffordd rydym ni’n cadw mewn cysylltiad â chi. Chi sy’n rheoli pethau a gallwch ddewis sut rydym ni’n cysylltu â chi neu atal gohebiaeth yn llwyr. Rhowch alwad i ni ar 029 2185 5050 neu cysylltwch trwy e-bostio contact-us@cancerresearchwales.org.uk
• Byddwn yn rhoi’r cyfle i chi ein cefnogi ni mewn ffordd sy’n gweithio i chi, a bod yn barchus ac yn sensitif i’ch amgylchiadau
• Ni fyddwn yn rhoi pwysau arnoch chi i roi mwy nac yn amlach. Os dewiswch chi beidio â rhoi neu os ydych am roi’r gorau i’n cefnogi ni, byddwn yn parchu eich penderfyniad

Bod yn atebol ac yn gyfrifol

• Byddwn yn defnyddio rhoddion yn ddoeth ac yn ofalus fel eu bod yn cael yr effaith fwyaf ar bobl y mae canser wedi effeithio arnynt yng Nghymru
• Byddwn yn dryloyw am ein costau codi arian – bydd hi’n hawdd cael at ein hadroddiadau blynyddol
• Byddwn yn gwrando ac yn dysgu, ac yn ateb unrhyw gwestiynau’n gyflym ac yn onest. Rhowch wybod i ni os cawn ni rywbeth yn anghywir. Rydych chi’n bwysig i ni ac mae clywed gan ein cefnogwyr bob amser yn bwysig i ni – rydyn ni’n addo y cewch chi ymateb cyfeillgar ac agored os byddwch yn cysylltu â ni. Darllenwch ein Polisi Pryderon a Chwynion.
  
• Rydym ni’n ymrwymo i safonau uchel a chydymffurfio â phob deddfwriaeth a chanllawiau codi arian a diogelu data ar draws ein holl weithgareddau codi arian. Rydym ni wedi cofrestru gyda’r Rheoleiddiwr Codi Arian a byddwn yn arddangos eu logo ar ein holl ddeunyddiau, i ddangos ein hymrwymiad i arfer gorau

Diolch yn fawr i chi am eich cefnogaeth. Byddwch chi’n helpu i greu dyfodol gwell i bawb sydd â chanser ar hyd a lled Cymru. Os oes gennych unrhyw gwestiynau, ffoniwch ni ar 029 2185 5050 neu e-bostiwch ni ar contact-us@cancerresearchwales.org.uk.